ఐపీఎల్‌లో చరిత్ర సృష్టించేందుకు అడుగు దూరంలో భువనేశ్వర్ కుమార్

ఇండియన్ ప్రీమియర్ లీగ్ (ఐపీఎల్) చరిత్రలో ఓ అరుదైన మైలురాయికి రాయల్ ఛాలెంజర్స్ బెంగళూరు (ఆర్‌సీబీ) పేసర్ భువనేశ్వర్ కుమార్ అడుగు దూరంలో నిలిచాడు. ఆదివారం చెన్నై సూపర్ కింగ్స్‌తో జరగనున్న మ్యాచ్‌లో అతను ఒక్క వికెట్ తీస్తే, ఐపీఎల్‌లో 200 వికెట్లు పూర్తి చేసుకున్న రెండో బౌలర్‌గా చరిత్ర సృష్టిస్తాడు. అంతేకాకుండా, ఈ ఘనత సాధించిన తొలి ఫాస్ట్ బౌలర్‌గా నిలిచి ఓ ప్రత్యేక రికార్డును తన ఖాతాలో వేసుకోనున్నాడు. ప్రస్తుతం భువనేశ్వర్ 191 మ్యాచుల్లో 199 వికెట్లతో ఈ మైలురాయికి అత్యంత చేరువలో ఉన్నాడు.

ఇప్పటివరకు ఐపీఎల్‌లో 200 వికెట్ల మార్కును కేవలం లెగ్ స్పిన్నర్ యజ్వేంద్ర చాహల్ మాత్రమే అందుకున్నాడు. చాహల్ 176 మ్యాచ్‌లలో 224 వికెట్లతో అగ్రస్థానంలో కొనసాగుతున్నాడు. 2024 సీజన్‌లో తన 153వ మ్యాచ్‌లోనే చాహల్ ఈ ఘనతను సాధించాడు. ఇప్పుడు భువనేశ్వర్ ఈ ఎలైట్ క్లబ్‌లో చేరడానికి సిద్ధమయ్యాడు. అతని కెరీర్ 2009లో ఆర్‌సీబీతోనే ప్రారంభమైనప్పటికీ, తొలి రెండు సీజన్లలో ఒక్క మ్యాచ్ కూడా ఆడే అవకాశం రాలేదు. ఆ తర్వాత పుణె వారియర్స్ తరఫున మూడు సీజన్లు ఆడినా పెద్దగా రాణించలేకపోయాడు.

అయితే, 2014లో సన్‌రైజర్స్ హైదరాబాద్ అతడిని కొనుగోలు చేయడంతో భువనేశ్వర్ దశ తిరిగింది. అనతికాలంలోనే జట్టు బౌలింగ్ విభాగానికి వెన్నెముకగా మారాడు. పవర్‌ప్లే, డెత్ ఓవర్లలో కీలక బౌలర్‌గా ఎదిగాడు. సన్‌రైజర్స్ తరఫున ఆడిన తొలి నాలుగు సీజన్లలో ప్రతీసారి 18కి పైగా వికెట్లు పడగొట్టాడు. 2016, 2017 సంవత్సరాల్లో వరుసగా రెండుసార్లు 'పర్పుల్ క్యాప్' గెలుచుకున్నాడు. 2016లో సన్‌రైజర్స్ తమ ఏకైక టైటిల్ గెలవడంలో భువీ కీలక పాత్ర పోషించాడు. ఇప్పటికీ సన్‌రైజర్స్ తరఫున అత్యధిక వికెట్లు తీసిన బౌలర్‌గా అతడే ఉన్నాడు.

2025లో తిరిగి తన పాత జట్టు ఆర్‌సీబీ గూటికి చేరిన భువనేశ్వర్, గతేడాది అద్భుతంగా రాణించాడు. 14 మ్యాచ్‌లలో 17 వికెట్లు తీశాడు. ముఖ్యంగా, పంజాబ్ కింగ్స్‌తో జరిగిన ఫైనల్ మ్యాచ్‌లో 17వ ఓవర్లో రెండు కీలక వికెట్లు తీసి ఆర్‌సీబీ తొలిసారిగా ట్రోఫీని ముద్దాడటంలో నిర్ణయాత్మక పాత్ర పోషించాడు. ప్రస్తుతం హేజిల్‌వుడ్ అందుబాటులో లేకపోవడంతో ఆర్‌సీబీ బౌలింగ్ భారాన్ని భువీ మోస్తున్నాడు. ఈ సీజన్ తొలి మ్యాచ్‌లో సన్‌రైజర్స్ బ్యాటర్లు విధ్వంసం సృష్టిస్తున్నా, భువనేశ్వర్ పొదుపుగా బౌలింగ్ చేసి కేవలం 31 పరుగులే ఇచ్చి తన సత్తా చాటాడు. ఇప్పుడు చిన్నస్వామి స్టేడియంలో చెన్నైపై ఈ అరుదైన రికార్డును అందుకుంటాడని అభిమానులు ఆసక్తిగా ఎదురుచూస్తున్నారు.